Listen & view Romowe Rikoito - Tot L'Aur del Mon E Tot L'Argen lyrics & tabs

Non es meravelha s'eu chan
melhs de nul autre chantador
que plus me tra.l cors vas amor
el melhs sui faihz a so coman
Cor e cors e saber e sen
e fors' e poder i ai mes
Si.m tira vas amor lo fres
que vas autra part no.m aten

Cant eu la vei, be m'es parven
als olhs, al vis, a la color
car aissi tremble de paor
com fa la folha contra.l ven
Non ai de sen per un efan
aissi sui d'amor entrepres
e d'ome qu'es aissi conques
pot domn'aver almorna gran

Ai Deus! car se fosson trian
d'entrels faus li fin amador
e.lh lauzenger e.lh trichador
portesson corns el fron denan!
Tot l'aur del mon e tot l'argen
i volgr'aver dat, s'eu l'agues
sol que ma domna conogues
aissi com eu l'am finamen

Bona domna, re no.us deman
mas que.m prendatz per servidor
qu'e.us servirai com bo senhor
cossi que del gazardo m'an
Ve.us m'al vostre comandamen
francs cors umils, gais e cortes
Ors ni leos non etz vos ges
que.m aucizatz, s'a vos me ren

A Mo Cortes, lai on ilh es
tramet lo vers, e ja no.lh pes
car n'ai estat tan lonjamen